بە مەرگی خۆت قەسەم، زاهید، هەموو عومرت عوبوورێکە
 مەقام و مەنزڵت، ئاخر، لەکن جەمعی قوبوورێکە

دڵم بەردە ئەگەر شاخە، بە چاوی سووکی مەنواڕێ
 بە خۆڕایی نەسووتاوە، ئەمیشە کێوی توورێکە

شوعاعی ڕووت لە گەردندا دیارە دڵ دەسووتێنێ
 بنازم بەم تەجەللایە، چ خورشید و بلوورێکە!

لە خەڵوەت هاتە دەر سۆفی، گڵ و بەردی بەسەرما دا
 مەکەن مەنعی لەبەر خەڵوە، ئەویش تازە غوروورێکە

غەمی چاوت لە چاومدا، هەمی قەددت لە سینەمدا
 لەبەر سستیی و زەعیفیی ئەو خەوێکە، ئەم خوتوورێکە!

بە زاهیر شادمانیمە لەبەر کەتمی هەموو دەردان
 کە 'نالی' گەر بناڵێنێ ئەمیش نەشئە و سوروورێکە